好多車友，都好似小編咁，因為戴單車頭盔之後會遮晒自己髮型，所以一直都唔肯戴頭盔出車。直至見到呢個頭盔，小編覺得，係時候可以戴頭盔了......

除左小編之外，原來都有人都覺得，戴住頭盔踩單車個感覺太蠢，而且單車頭盔來來去去都係嗰幾款，無哩新意，所以就致力設計一款又時尚又型嘅單車頭盔。有一日，佢哋突然見到 Lego 公仔個頭，頭上面個 ｢頭髮｣ 竟然可以拆得走！套落 Lego 公仔時候又啱啱好，好似單車頭盔咁！所以佢哋就開始 Copy 一個同真人 1:1 咁大嘅 ｢單車假髮頭盔！｣

有咗呢個設計概念之後，就開始幫真正 Lego 頭做掃描，用電腦畫模，搵 3D Printer 打印製成品，再上色，最後裝埋頭盔嘅帶，咁樣，一個好似假髮咁嘅 Lego 形頭盔就誕生咗喇！

最後，都要講講個設計概念：其實呢個 Lego 形頭盔由 2 個分別來自斯德哥爾摩及哥本哈根 ( 都係 Bike Friendly 嘅城市啦！) 的廣告公司員工 Part-Time 設計出嚟，點解要設計 Lego 頭頭盔就係因為有研究指出，大約 44% 的小朋友踩單車時都唔鍾意戴頭盔，為咗鼓勵佢哋戴頭盔踩單車，於是就想設計一個佢哋都覺得過癮嘅頭盔，令佢哋肯戴，從而希望減低傷亡。

不過好可惜，呢件產品全世界暫時只有一件，兩位設計師仲未有量產嘅打算，所以都未有價錢。不過諗諗下，如果成條單車徑個個都戴著呢個 ｢假髮｣，情景的確幾搞笑！

Lego 形頭盔，睇落好似一個硬膠假髮，但遠睇嘅話應該無人睇得出係單車頭盔！

一切從呢粒細細粒嘅 Lego 頭髮開始。設計師就係用佢嚟放大 N 倍，變成一般人可以戴得到嘅頭盔尺寸

真係好認真架，連 Pantone 顏色都要對埋！

之後用 3D 掃描機掃描一次，再晌電腦執執

3D Printer 打印出嚟嘅成果，睇落呢個頭盔應該可以有白頭髮版賣

之後噴返頭先辛辛苦苦對完嘅啡色

裝埋頭盔入面必要嘅墊呀，帶呀，就完成收工！

有網站 PS 咗一張相，模擬如果係單車運動員戴咗呢個頭盔嘅情況。又好似唔錯喎！

介紹短片：

相關網址：Someone Made A Real-Life LEGO Hair Bike Helmet That Turns You Into A LEGO Figure

MOEF