單車公園遊 九龍灣單車公園學單車好去處
Oct 09, 2016 - 單車蒲點  

識得小編又知道小編成日踩單車車的朋友,都成日會問:可唔可以教我踩單車?同埋學單車去邊度好?本來小編都係話去單車徑旁邊學啦,直至去過呢個單車公園......

呢個單車公園位於九龍灣麗晶花園隔鄰,所以不算有很多人熟悉,又因為距離九龍灣 / 彩虹地鐵站有一段距離,所以就更加少人會特登過去。不過另一個角度諗,就因為無乜人去,所以如果有朋友唔識踩單車,或者好耐無踩單車想攞返個感覺的話,呢度都係一個好好的練習場,起碼有咩事都唔會尷尬嘛!

先睇睇地圖,大約知道晌邊先:

交通

可乘搭到麗晶花園的小巴:
51M: 九龍灣地鐵站 - 麗晶花園
56: 觀塘(崇仁街) - 麗晶花園
46: 大角咀(維港灣)-麗晶花園

巴士:
24: 旺角 - 啟業邨
107: 香港仔華貴邨 - 啟業邨
108: 北角寶馬山 - 啟業邨

泊車: 附近有露天時租停車場

單車租賃

日租:HKD $120

又係用相片說故事時間!

到單車公園門口,就會見到呢個地圖,睇落都唔係好大......

單車公園當然都會有單車舖租單車啦,未知有無時租單車,
但如果日租的話要 HKD $120 一日,小編覺得無必要租一日掛......

單車徑的入口,記住右邊入,左邊出

呢個單車徑有得特別的地方: 晌單車徑入口不遠處你會見到一個專為初學者而設的小型單車徑,
就好似游泳池的兒童池咁,專為小朋友或者初學者學踩單車,
所以係全平路,亦都唔怕尷尬,因為大部份小朋友都係一樣學緊單車,
亦因為咁會有好多家長會帶小朋友嚟學踩單車

而中間都有一個小型鑊仔,有個小小的斜路幫你學踩單車

自問已經完成訓練,要挑戰更高難度的單車徑的話,就可以返到單車徑入口轉左,踩上呢條天橋

其實由外面睇入嚟,呢條天橋真係幾靚架,尤其是夜晚著左燈之後,
不過上斜位都算長,初學,或者要傍住個初學踩單車的朋友要留意

然後就係落斜,呢個係最重要最重要,學踩單車一定要識的技能!
呢條斜路長度唔算太長太斜,但已經足夠初學者要小心對待!好好練習下落斜時使用剎車的技巧吧!
就算唔識剎車,如果斜路底無人都還算安全的......
(小編覺得,未識用剎車掣的話,都係留晌兒童池繼續練習下先啦......)

落斜之後大直路盡頭都係一鑊形斜路,不過呢個比兒童池嗰個再高多少少斜多少少

然後返轉頭的話就靠左

繼續踩就好快會返返到單車徑入口

左面都有一個暫緩區,唔知用嚟做乜,不過都係一個停車位,地方亦算大,
如果晌兒童池學踩單車怕尷尬驚俾小朋友笑的話可以考慮晌呢個小小的位置學平衡

反而鍾意影相的朋友,暫緩區橋底係其中一個影相的好地方

踩到倦的話,臨到單車徑入口位有一個飲水位可以入去飲下水同裝水

再行前少少就會返返到單車徑入口,完成一個圈!

 

與以往一樣,小編都會有小小建議俾大家:

  1. 如果你已經完全識踩單車,係想以探險形式,或者係好有期望嚟呢度踩的話,就先唔好抱咁大期望......要去探險上蒲崗村道單車公園會仲有趣!如果係踩開車,經開附近入去睇下反而唔錯!
  2. 可以考慮自己帶單車過嚟,始終租單車價錢......
  3. 走完一個圈只需 2-3 分鐘,所以呢度真係適合學單車朋友過嚟無壓力咁學踩單車!

 

 



Share
分享至 facebook

讀者投稿

誠意邀請各位以文字、相片甚至影片,跟大家分享有關單車的事!
題材不限,隨便發揮,內容如路線靚相、經驗之談、遊記趣聞、買車改車等亦可。
內容版權歸作者所有,亦歡迎留下大名 / 筆名,以供萬民歌頌。XDD

投稿方法:請把以下檔案電郵至 submit@15km.hk:
- 內文 (Word / 純文字)
- 圖片 (JPG, 600px 或以上更好)
- 影片 (eg: Youtube link)
- 閣下姓名及聯絡方法

註:15km.hk 保留最終刊登、修改權利;投稿文章皆為作者本人立場。


相關文章
驚人發現!單車扮電視減 8 成運送損毀
驚人發現!單車扮電視減 8 成運送損毀
全天候保護:12 功能集一身的 BARKOR
全天候保護:12 功能集一身的 BARKOR
室內單車徑?點止咁簡單!
室內單車徑?點止咁簡單!
單車公園遊 夜闖九龍城單車公園
單車公園遊 夜闖九龍城單車公園
單車公園遊 慈雲山蒲崗村道單車公園 香港第一高架單車徑
單車公園遊 慈雲山蒲崗村道單車公園 香港第一高架單車徑