踩單車玩 Pokemon Go! 必備!單車電話座助你捉小精靈!
Jul 26, 2016 - 單車新聞 , 硬件快遞 , 開心Share  

Pokemon Go! 終於在香港 App Store 及 Play Store 上架!唔想行路出街捉小精靈,踩單車就係好好嘅選擇!15km.hk 特意揀幾隻單車 Mount,幫你踩車出去捉精靈,Get!

乜電話都用得系列:

下面呢幾個算係萬用電話夾,基本上市面買到嘅智能電話無論 iPhone Android 都可以夾落去!

1. Minoura IH-520 Smart 電話座

呢個日本造嘅萬用單車手提電話座,設有上下可以調校長度嘅臂,加上兩側可以調整闊度嘅夾,令佢可以夾到 iPhone 6s, 6s Plus 及一眾 5.5" 螢幕大細嘅 Android 手機,行過路面較差嘅單車徑都可以夾實電話,加上有一條矽膠帶幫手固定電話,就更難跌電話啦!而電話座本身亦都可以調校上下角度最多約 9o,同埋可以自轉 360o,方便精靈訓練員可以睇到自己幾時會到目的地,同周圍捉精靈!

建議零售價:HKD $258

Minoura 電話座有分金屬 Mount 及膠 Mount,適合唔同尺寸嘅前把,賣點係日本製造同埋夾電話超穩陣!

2. iOttie Active Edge Bike & Bar Mount 電話座

呢個牌子嘅電話座設計就比較簡單,中間一個大彈弓可以夾到不同長度嘅電話,而底部左右兩邊嘅夾就可以調校闊度,最多可以去到 3" 闊。而比 Minoura 好的地方係,呢個有一個快拆鎖,精靈訓練員只要撳一撳個掣,就可以鬆開個鎖攞部電話出嚟,捕捉小精靈!

建議零售價:HKD $398

 

設計有啲似手掌,中間彈弓臂可拉至 6.5" 長,闊度亦可拉至 3" 闊,無論有無用電話套,都可以適合不同智能電話,幫助每一位精靈訓練員出去冒險

亦有快拆設計,方便訓練員快速拆下電話捕捉罕有精靈

不過上面兩隻就未有防水功能,對於全職精靈訓練員經常同單車於戶外日曬雨淋的話,分分鐘好快就會整壞佢哋最重要財產 - 電話,所以以下有防水功能嘅電話座應該好適合佢哋! ( 不過都係偏心用 iPhone 嘅精靈訓練員 )

3. Topeak Smartphone Drybag 防水袋

防水袋?無錯!呢個 Topeak 嘅防水袋其實係可以俾精靈訓練員晌海邊要游出海 ( 唔好玩啦!無可能要出海捉精靈 ) 嘅時候保護自己電話唔好入水!講返個袋本身先,底部採用全泡棉式保護,螢幕面頭就用 TPU 物料製造,全透明又可以用手指掉出精靈球,加埋機頂捲入式封袋設計,同埋無縫設計,不但防水,亦可以為電話提供一定程度保護!背後亦有 Mount 落特別設計的單車 Mount 的 Topeak Ridecase Mount,咁就可以好快拆電話落嚟捉精靈!

建議零售價:HKD $240 ( iPhone 6 Plus / 6s Plus );HKD $200 ( iPhone 6 / 6s );HKD $228 ( 5-6" Android 電話 )

兩款防水袋可放入 iPhone 6s / 6s Plus,無縫設計,頂頭用捲入式封袋設計,絕對防水;TPU 透明物料亦都可以令精靈訓練員容易睇到螢幕 ( 唔好淨係望電話唔望路呀!),後面的 Mount 就可以裝到 Topeak 專門為單車設計的 Ridecase Mount 上

4. Topeak iPhone 6s/6s Plus 防水電話殼

萬一遇著有啲精靈訓練員唔鍾意用套,咁點算呢?唔緊要!Topeak 另外都有推出 iPhone 6s / 6s Plus 嘅專用手機殼,方便一眾唔用手機套嘅精靈訓練員用,因為呢個殼係為 iPhone 6s / 6s Plus 度身訂造,防水防塵級別達到 IP66,頂部耳筒位同底部 Lightning 接口都有蓋,加強防水防塵保護。平時唔踩單車就可以當普通防水殼用,到踩單車出發去捉小精靈時就只要裝返上 Topeal Ridecase Mount,就可以踩單車繼續用!

建議零售價:HKD $560 ( iPhone 6 / 6s / 6 Plus / 6s Plus )

平時可以當普通防水殼用嘅 iPhone 6s / 6s Plus 殼,耳筒位同 Lightning 接口都有蓋作防水,所以先可以達到 IP66 防水防塵認証!

當然不論殼或者防水袋,都要靠呢個 Topeak Ridecase Mount 先可以上到單車頭通。精靈訓練員記住要買埋呢個配件!

或者身為精靈訓練員嘅你會問:我成日出去捉精靈,部電話嘅電倒水咁倒,有無一個電話座可以綁埋尿袋用架?

有!

5. Topeak TSPH-1 可以叉埋電嘅手機座

呢個應該係各位踩單車去冒險嘅精靈訓練員夢寐以求嘅單車座!其實 TSPH-1 只係一個有矽膠外套嘅 7,800 mAh 容量嘅外置叉電器 ( 即係尿袋啦!),面頭有兩條矽膠帶可以綁住 4.5" - 5.5" Mon 嘅手提電話,底部就有兩個扣可以綁住尼龍帶然後安裝到頭通,亦都有小附件可以為訓練員的電話叉電線做 Cable Management 卷住電線,唔好俾電線周圍飛!一個 2.1A 及一個 1A USB 插頭支援同時為兩部電話或裝置一齊叉電,全職精靈訓練員就唔怕捉捉下小精靈嗰陣電話突然無電啦!

就咁睇好似只係一個尿袋加一個矽膠套就算,但其實面頭可以綁實一部 4.5" - 5.5" Mon 大嘅手提電話,好似圖中的 iPhone 6 Plus,而底部又可以加多條尼龍帶綁實鵝頸,長時間冒險嘅精靈訓練員必備!

一個 2.1A 及一個 1A 輸出的 USB 可以同時為兩件裝置叉電

設有捲線器好讓訓練員唔使諗點樣處置叉電線,專心一意捉精靈!

建議零售價:HKD $680

最後,雖然 Pokemon Go! 好好玩,亦都俾足藉口大家出去踩下單車行下街,但小編都要認真呼籲:
踩單車時唔好淨係望住電話,要觀察四方留意路面情況!咁啱遇到罕有小精靈要停低捉的話,可以慢慢減速然後泊埋單車徑一邊 ( 當然最好落車推上行人路!) 先攞起電話捉精靈,或者關左 AR 來捉,如果唔係晌路面急剎或者塞住單車徑,不但為其他單車使用者造成不便,更對其他踩單車人仕構成危險!做個小心嘅精靈訓練員先玩得開心又放心嘛!

產品查詢:

1. 鎮洋兄弟單車公司:Tel. 2666 1183
香港新界上水新豐路132號地下

2. 野牛單車:Tel: 2368 4000
香港九龍旺角油麻地廣東道831號金堂商業大廈1樓全層





Share
分享至 facebook

讀者投稿

誠意邀請各位以文字、相片甚至影片,跟大家分享有關單車的事!
題材不限,隨便發揮,內容如路線靚相、經驗之談、遊記趣聞、買車改車等亦可。
內容版權歸作者所有,亦歡迎留下大名 / 筆名,以供萬民歌頌。XDD

投稿方法:請把以下檔案電郵至 submit@15km.hk:
- 內文 (Word / 純文字)
- 圖片 (JPG, 600px 或以上更好)
- 影片 (eg: Youtube link)
- 閣下姓名及聯絡方法

註:15km.hk 保留最終刊登、修改權利;投稿文章皆為作者本人立場。


相關文章
平價 BB 車?Taga 2.0 自己踩的 BB 車!
平價 BB 車?Taga 2.0 自己踩的 BB 車!
旗艦全新定義!Shimano DURA-ACE R9100 發表
旗艦全新定義!Shimano DURA-ACE R9100 發表
實地試踩!高山飛驒火車軌單車遊!
實地試踩!高山飛驒火車軌單車遊!
你去過幾多個?台灣票選十大最喜愛單車徑
你去過幾多個?台灣票選十大最喜愛單車徑
真正打機踩單車!Zwift 網上連線玩單車公路賽!
真正打機踩單車!Zwift 網上連線玩單車公路賽!