實地試踩!高山飛驒火車軌單車遊!
Jul 07, 2016 - 精選文章  

是咁的,早兩年小編發現到日本中部,高山奧飛驒原來有樣好有趣嘅單車玩意,就係晌火車軌上面踩單車喎!小編睇完嚇一跳,然後得啖笑,心諗應該唔會好特別吖!但踩完之後先發覺,原來幾過癮!

愈來愈多香港人選擇到日本中部,尤其是名古屋出發,到高山、飛騨、立山黑部、白川鄉等地旅遊 ( 昇龍道 )。而今次所介紹的火車軌單車,位於奧飛騨,你可以於高山駅乘搭濃飛巴士再轉乘的士,又或者駕車前往 ( 較推薦,始終時間較為彈性!)

Gattan Go! 火車軌單車的介紹在此不贅,有興趣的朋友可以參考一下我們的舊 Post 呢 《在火車軌上踩單車》

有圖有真相!等小編話俾大家知有幾好玩!

位於岐阜縣的奧飛騨,一處本已被荒廢的電車站上,由日本人憑創意改變成一處有趣旅遊點!

未到達先興奮!揸車去到 Gattan Go! 之前係會見到呢條火車軌,如果同行有朋友而又帶咗長焦距鏡頭嘅話,呢個係一個好好嘅影相地點!

到步之後當然要周圍睇下有咩睇啦!一部部火車軌單車已經整齊排列好 ( 晌遠處!)

結構其實唔複雜,中間有把手方便工作人員拉單車出入,並唔係拉 Brake 呀!( 好似係 )

同場仲有電單車版火車軌 「電單車」、同埋有飛騨寶寶 Print 的 BB Seat 位

好喇!book 咗單車,晌落場玩之前,你都要先上一堂,聽下踩緊單車嗰陣你要注意嘅事項 ( 全程日文,不過你咁聰明,應該聽得明佢哋講咩嘅!),唔識日文都唔緊要,嗰度有繁體中文踩車需知會俾你睇,所以放心!

仲可以趁未開始踩之前,去隔離間 Cafe 食下嘢!認真講味道就一般般啦,姑終日本咁多好嘢食......

說回單車本身喇!想踩混合單車 (即係單車度有摩打幫你行) 的朋友就有福喇!因為呢度全部單車都係混合單車,操作亦都好簡單,左面有個控制板,你只要 set 速度就可以!同埋工作人員都會幫你 set,所以就算係唔攸運動嘅女仔,踩呢條有少少上落斜嘅路軌都唔成問題!

中間有部輪椅?!原來呢部係工作人員專用車,有工作人員會坐晌中間跟住大家行,萬一有事嗰陣都可以多個人幫手!

出發喇!Gattan Go! 網頁講到晌春天時間路軌兩邊都係櫻花,好靚咁話!雖然小編當天去到嗰陣天陰陰,加埋正值櫻花期末,所以景色係差少少,但都幾靚吖!

過呢啲路軌轉線位嗰陣幾得意架,踩過你就知!

沿途風景其實真係幾靚,如果秋天的話全部樹變做紅葉,成個山都紅色應該仲好睇!

中間真係會經過一啲荒廢咗嘅電車站,踩緊嗰陣感覺就好似自己揸緊電車咁,好得意!

有一段路仲有民居添!

入隧道喇!

隧道同你搭火車嗰陣經過嘅九龍塘畢架山隧道一樣,入面都係無燈,伸手不見五指,好彩「火車」車頭有燈,而且有光暗感應,會自動開關,所以你就唔使左搵右搵頭燈開關掣!

出隧道喇!

一出隧道又另一番風景!

仲會經過第二個站!雖然小編有諗過停車爬上個站度影相,但咁樣停車一嚟阻到人,二嚟開始前都講過晌路軌踩車嗰陣唔好立亂停低,所以小編都係經過就算......

嗱,真係有櫻花架!櫻花滿開嗰陣嚟踩單車影相應該 「呃」 到唔少 like!

另一邊終點其實係一個小鎮


到左一邊的終點時,參加者都可以落車周圍行下,晌路軌影下相、晌個站度影下相......

仲引咗當地山水俾參加者飲,放心,呢度嘅水應該乾淨過某個地方抽過嚟香港嘅水好多,可以放心飲,夏天就最正喇!

當參加者一路晌附近玩緊嗰陣,其實工作人員忙於將你的單車抬起、調頭、放返落路軌,都幾辛苦架!而休息時間大約 10 分鐘,然後就踩返去!

一開始就要轉三條路軌先會去到主路軌

 

返轉頭時其實風景差唔幾 (當然架啦呢個!) 不過遇到小學生放學行過,都幾得意嘅!

返去嗰陣終於可以睇下部單車構造!其實好簡單,兩個單車轆晌火車軌度行,中間亦都有滑輪定住成個單車架,所以唔驚會跌車,亦都好似普通單車咁剎車,而因為日日行路軌嘅關係,單車胎都滿佈鐵鏽,而好在有泥檔同車尾有一大塊膠擋著由轆濺出嚟嘅污糟嘢,就唔怕整污糟你啲旅行衫喇!

返到起點喇!有啲火車標誌都仲晌度無拆落嚟,而其實呢個係指示你要停晌呢度,有工作人員會幫你影相~

返去喇!全條路最有挑戰性嘅,應該就係呢條斜路!成個旅程就完喇!需時大約一個鐘

同其他旅遊點一樣,工作人員幫你影完相之後,就會 Print 埋出嚟俾你揀,就可以即刻買返啲相架喇!( 300 Yen 一張,同埋點解啲相係白色係因為相片經過特別處理防止私隱流出,包括小編......)

Gattan Go!: http://rail-mtb.com/en/

前往方法:

1. 巴士:可先預約,然後於 JR 高山站乘搭濃飛巴士到「濃飛巴士神岡営業所」(需時 80 分鐘),再轉的士前往 Gattan Go! (需時 10 分鐘),來回套票連的士車費一個人 4,000 Yen。注意係咁樣搭比較限時限刻,要一早 plan 定以免浪費時間!

2. 自駕遊:晌車的 GPS 入面用電話號碼:「0578-82-4008」 定位,就可以去到,或者用呢個 Google Map 定位都得!

3. 踩單車:Er......跟返上面嗰個 GPS 定位就得喇!

 



Share
分享至 facebook

讀者投稿

誠意邀請各位以文字、相片甚至影片,跟大家分享有關單車的事!
題材不限,隨便發揮,內容如路線靚相、經驗之談、遊記趣聞、買車改車等亦可。
內容版權歸作者所有,亦歡迎留下大名 / 筆名,以供萬民歌頌。XDD

投稿方法:請把以下檔案電郵至 submit@15km.hk:
- 內文 (Word / 純文字)
- 圖片 (JPG, 600px 或以上更好)
- 影片 (eg: Youtube link)
- 閣下姓名及聯絡方法

註:15km.hk 保留最終刊登、修改權利;投稿文章皆為作者本人立場。


相關文章
15km.hk 實測 STRiDA B TYPE:另類優閒風格
15km.hk 實測 STRiDA B TYPE:另類優閒風格
限量碳纖黑魂:實看輕如公路車的 STRiDA C1
限量碳纖黑魂:實看輕如公路車的 STRiDA C1
在火車軌上踩單車
在火車軌上踩單車
你去過幾多個?台灣票選十大最喜愛單車徑
你去過幾多個?台灣票選十大最喜愛單車徑
踩單車去 Camp? 拖個 Wild Path Camper 就得!
踩單車去 Camp? 拖個 Wild Path Camper 就得!