單車知識:甚麼是 LOCK 踏?
Sep 03, 2015 - 技術分享 , 硬件快遞  

你可能成日聽到 Lock 踏一詞。究竟咩係 Lock 踏?Lock 踏有咩用?點解要用呢?用 Lock 踏有咩要注意?會唔會好唔方便呢?以上或以外嘅迷思,下文應該可以幫你逐一解答。

繼電影《破風》上映之後,引起了一股單車熱,小編都希望有更多車友加入呢個小小圈子!通常玩得咁上下,或者有朋友玩開的話,未買車時都已經會講起用 Lock 踏點點點,會快啲,會慳力啲,會 Pro 啲云云...... 小編今次就想講下,咩係 Lock 踏!

1. 甚麼是 Lock 踏?

Lock 踏即 Clipless Pedal / 鎖踏。 而現代的 Lock 踏基本上分成兩大種類,MTB / RB。 ( MTB 是山地車,即越野車啦。RB 即破風入面出現果類叫公路車的單車!)

2. 點解唔用普通腳踏,要用 Lock 踏?

Lock 踏同普通腳踏嘅分別,在於普通腳踏大多於腳踏兩面,有凸出嘅部份去抓著鞋底,令車手雙腳可以緊貼腳踏去發力。而兩面都提供相同嘅抓著力,所以唔需要去理正定反面。 但普通腳踏對唔同鞋都有唔同嘅抓著力,而且當發力比較大嘅時候,好容易會甩腳,所以有人索性諗到將鞋同踏扣埋一齊咪得囉!(如下圖,我咃叫佢做 「狗嘴」!Fixed Gear 常見!)

而現代化嘅 Lock 踏就係用扣鎖嘅機制去鎖緊鞋底嘅扣,令車手雙腳緊鎖晌腳踏上,就可以傳遞最大力量到腳踏,即係話你每踩一腳,都會更有效率,更慳力,更快,同埋「唔會咁易甩腳!」

公路車嘅 Lock 踏大多都係一邊面 ( 上圖右邊 ),一邊底 ( 上圖左邊 )。只有一面可以上 Lock,另一邊就唔可以上,兼且好跣添!

而山地車 Lock 踏就大多數兩邊腳踏都可以上 Lock ( 例子有 Shimano SPD / TIME / Ritchey / LOOK )

或者好似打蛋器系列 ( Crank Brother – Egg beater ) 咁可以四邊上 Lock 添!

3. 咁用 Lock 踏要注意啲乜呢?同埋點樣揀 Lock 踏呢?

首先,決定用咩腳踏前,首先你要知道自己想買山地車定公路車嘅 Lock 踏。因為佢地嘅鞋係唔同架!( 如下圖 )

公路車嘅鞋碼就會比較大 ( 上圖 A 及 B ),因為公路車更著重力量傳遞,大嘅鞋碼可以加大發力面積。而且公路車亦唔需要過份顧及行路嘅方便性:因為你對車鞋係用嚟踩單車,而唔會落地嘅!

相反,山地車好多時都需要晌山上面推下車行下路,所以山地車嘅車鞋於設計時會兼顧埋行越野路。正因如此,鞋碼就會設計得盡量細少同唔會突出,令鞋底有更多面積於行路時同地面接觸。同時,山地車鞋碼採用金屬製造,比起公路車嘅鞋碼就會更加耐用。

小編覺得,若果你需要兼顧行路嘅方便性,踩車時又會去飲飲食食,又唔需要去到好專業,去到爭分奪秒嘅話,其實就算公路車用山地 Lock 踏,亦都未嘗不可!記著,器材死嘅,人係生嘅! 而用山地車 Lock 踏又可以令你踩車時更方便,更少煩惱,咁又何樂而不為呢!

更重要嘅,係如果你晌燈位會緊張,紅燈轉黃燈果一秒就要起步,電光火石之間你會擔心上唔上到 Lock 嘅話,用 山地車 Lock 踏就正正可以解決呢個問題!到你練熟左再轉公路車 Lock 踏都未遲吖!

4. Lock 踏用咩牌子好呀?

當你決定好用山地踏定公路踏之後,相信你就應該會問,咁用咩牌子好呢?

嘩有咁多牌子?好打意呀!但係有咩分別架?其實,主流都會用 Shimano SPD / Look Keo ( 台灣 Exustar 都係用 Look system ) 比較多嘅。 Time 都係比較少人用,所以直接省去喇......

就新手而言,小編強烈建議用 Look System,特別女仕! 點解呢,因為 Look 比 Shimano 更易上 Lock。或者你會問,佢地都有得較鬆緊架啦,咁有咩分別喎!無錯,甩嘅鬆緊係可以較,但入果下力度,Look 係比 Shimano 更輕力就入到!若果用開 Lock 踏嘅朋友,其實嗰少少分別,對車友嚟講真係唔係咩大分別嚟嘅。但新手嚟講,可能呢少少就可以令佢地更加易上手架喇!所以,小編都會建議入門用家,可以先用 Keo,因為呢套踏係會更容易捉到上 Lock 嗰下嘅感覺。

而 Shimano SPD 因為上 Lock 嗰一下需要較大力,變相上唔上到 Lock 嘅感覺會更加清晰,用開 Lock 踏嘅小編,或者用開 Lock 踏嘅車友,就更偏向用呢種感覺清晰嘅踏,避免未扣穩就比力,一下扯甩就真係......

今次打住咁多先,下集再同大家分享車鞋,鞋碼同山地車 Lock 踏!

 

文:Jason (特約編輯)

 




Share
分享至 facebook

讀者投稿

誠意邀請各位以文字、相片甚至影片,跟大家分享有關單車的事!
題材不限,隨便發揮,內容如路線靚相、經驗之談、遊記趣聞、買車改車等亦可。
內容版權歸作者所有,亦歡迎留下大名 / 筆名,以供萬民歌頌。XDD

投稿方法:請把以下檔案電郵至 submit@15km.hk:
- 內文 (Word / 純文字)
- 圖片 (JPG, 600px 或以上更好)
- 影片 (eg: Youtube link)
- 閣下姓名及聯絡方法

註:15km.hk 保留最終刊登、修改權利;投稿文章皆為作者本人立場。


相關文章
15km.hk 送你《破風》電影戲飛
15km.hk 送你《破風》電影戲飛
土豪專用!要價 300 萬的Firebox 24K 金單車
土豪專用!要價 300 萬的Firebox 24K 金單車
Bike Fitting 簡單化 - Shimano x bikefitting.com 系統簡介
Bike Fitting 簡單化 - Shimano x bikefitting.com 系統簡介
單車知識:淺談碟剎制式與類型
單車知識:淺談碟剎制式與類型
單車避震點樣 set?簡介設定單車避震方法
單車避震點樣 set?簡介設定單車避震方法