新手教學:識踩唔識停之點樣去剎車?
Feb 15, 2015 - 技術分享 , 精選文章  

你以為踩單車識得踩直線,識得轉彎就叫做識踩單車?當然唔係啦!你仲要識停車架!

某經典港產片有句金句:最緊要人惡過車,唔可以俾車惡過人!踩單車都係一樣,如果踩著一部你控制不了的單車,就好容易發生意外,傷到自己傷到人。所以,要人惡過車,一定要完全了解自己的單車,掌握佢既操控,你先可以踩得開心又安全!而掌握操控,除左要識得向前踩同轉彎之外,停車都係好緊要既一環。小編今日就同大家講解一下踩單車有咩方法停車,同埋分享小小停車 (即係剎停部單車啦!) 嘅技巧啦!

識踩得快,都要識點樣整停部單車,咁先踩得安全架嘛!

 

1. 撞埋邊、直接撞埋牆度停低
有用程度: ☆☆☆☆☆ 基本上完全無用!

要一部單車停低,一係等部單車自己慢慢停低,一係將部單車撞埋去其他物件而令佢停低!但咁樣就唔叫做操控緊部單車啦,係咪?

撞埋牆唔係停唔到嘅,但後果就係好似相入面位仁兄咁......你想咁樣嗎?

 

2.  用自己對腳磨地
有用程度: ★☆☆☆☆

唔靠撞,唔靠剎車掣,用自己對腳踩實地下磨都可以算係叫做一個停車既方法來嘅!因為雙腳同地下會產生摩擦力,令單車減速甚至停低。通常剛剛學識將部單車踩向前嘅朋友,都會用呢個方法整停部單車!因為佢地仲未識得用剎車掣吖嘛!雖然咁做都算係叫做整停到部單車吖,但個效率低得緊要囉……

其實當單車兩個剎車掣都同一時間失靈的話,雙腳磨地剎車都係最後一個剎車方法。但你停低部單車之後,可能要諗諗,點解你部單車的兩個剎車掣會同一時間咁啱一齊壞喇……)

用雙腳磨地停車,有用程度絕對唔高,初學單車者切記盡量唔好用對腳磨地停車,要快快掌握點樣鍊 Brake 呀!

 

3. 用手大大力鍊實剎車掣
有用程度: ★★★★☆ (但危險程度 ★★★★★!)

好多新手踩單車想停車時,都會不分前後 Brake,大大力鍊實其中一邊,或者兩邊剎車掣!咁做當然可以令到部單車即時停低啦,但係停得咁急咁快,好多時有機會會令後面緊隨嘅單車剎掣不及撞向你度,造成意外。而如果落斜時咁做就更危險,因為咁突然同大力鍊實剎車掣時,會鎖死單車前輪或後輪:鎖死後輪就會令單車極容易失控,你可能因為控制唔住單車而炒車;鎖死前輪就會因為物理定律,連人帶車向前翻滾,甚至會被拋出車外!所以除了極緊急的情況之外,盡量唔好一下鍊實個剎車掣!

上面就簡簡單單話俾大家知,落斜嗰陣大力鍊 Brake 嘅話,會發生咩事......

 

4.分清前後 Brake,左右剎車掣,就力鍊剎車掣剎車 (戲肉來喇!)
有用程度: ★★★★★

好了,前面講完踩單車危險停車法,而家要介紹一下踩單車真真正正安全的剎車方法喇!

首先,你要認清左右手剎車掣分別控制著前 brake 或後 brake。因為於不同情況,你都需要使用前或者後剎車。一般情況下,小編都會建議大家使用後剎車,因為可避免剎車時鎖死前輪造成意外,但於平路時,要減慢車速的話,輕力鍊前剎車掣亦未嘗不可!

認清前後 brake 的剎車掣位置同用法之後,就係時候講講鍊剎車掣既力度喇!頭先都提過,如果一下子用盡力鍊實個 brake,不單唔會令自己停車停得安全,仲會增加炒車機會造成意外!所以鍊 brake 的方法係有技巧架!小編建議大家剎車時,先輕力鍊剎車掣,感受一下剎車力度,如果不夠先再大力啲鍊剎車掣,令單車停低 / 減至理想速度,咁樣剎車,就安心又放心喇!另外係落斜時剎車,不妨坐後一啲,等重心移後,咁就可以避免向前翻滾嘅機會。

無信心剎車剎得好?唔怕!踩多幾次單車,感受一下踩單車樂趣,自自然然就會掌握到更多踩單車技巧,踩得更安全喇!

一部單車一定會有前後 Brake,踩單車前,建議大家先確定兩邊剎車掣分別係控制前 Brake 定後 Brake。測試方法好簡單,你只要鍊實其中一邊 Brake,再推前 / 推後單車。如果單車不能向前移動,即係你用緊前 Brake,反之亦然。知道前後 Brake 的控制方法,你先可以知道點控制部單車!

另外,鍊 Brake 亦不建議一下子鍊實單車,應先輕力慢慢鍊 Brake,如果減速效果不理想先再慢慢加重鍊 Brake 力度。一下子鍊實 Brake 好易發生意外!切記切記!

 

特別 Case:部單車無 brake 既?!咁點剎車呀?

有陣時你可能會遇到有啲單車,一個 brake 都無既,你就會問,究竟呢D單車係點樣停車呢?其實呢類單車,通常係 fixed gear 單車或者係 BMX 單車,佢地既停車方法都比較特別,例如 Fixed Gear 需要利用腳去後踩,甚至 Skid 等技術來令後輪鎖死或減速,達至剎車效果。而 BMX 都有自己特定的技巧去停車。所以,佢地其實都有辦法停車架!

好似 Fixed Gear 呢類型單車,無裝 Brake 的話,其實都可以停車嘅!就係靠腳踩停齒盤鎖死後輪,稱為 Skid,但這高難度動作並不是人人做得到,要經長時間專人指導訓練先得架!
( 有關 Fixed Gear 的資料,可參考哩度)

仲有一個辦法就係用腳踩住車輪剎車!但危險性高、實用性不高,亦會弄污鞋底,唔係必要都唔好用!

小總結,識踩單車,一定要識得點樣踩車!雖然整停部單車有好多種方法,但要安安全全停車,始終都要了解剎車技巧,點樣鍊 brake 同幾時用前後 brake,咁先至可以踩單車踩得安全架!

如果覺得本文有用,亦都歡迎大家開心 share 去自己 Facebook 呢!

Like us on Facebook!




Share
分享至 facebook

讀者投稿

誠意邀請各位以文字、相片甚至影片,跟大家分享有關單車的事!
題材不限,隨便發揮,內容如路線靚相、經驗之談、遊記趣聞、買車改車等亦可。
內容版權歸作者所有,亦歡迎留下大名 / 筆名,以供萬民歌頌。XDD

投稿方法:請把以下檔案電郵至 submit@15km.hk:
- 內文 (Word / 純文字)
- 圖片 (JPG, 600px 或以上更好)
- 影片 (eg: Youtube link)
- 閣下姓名及聯絡方法

註:15km.hk 保留最終刊登、修改權利;投稿文章皆為作者本人立場。


相關文章
專為「托」上肩而開發的 Shoulder Bike
專為「托」上肩而開發的 Shoulder Bike
超簡單!將一般單車變身電動的 Smart Wheel
超簡單!將一般單車變身電動的 Smart Wheel
Fixie 達人分享 了解香港 Fixed Gear 界二三事!
Fixie 達人分享 了解香港 Fixed Gear 界二三事!
新手教學:點解要轉波?
新手教學:點解要轉波?
淺談單車安全 – 自身硬件篇
淺談單車安全 – 自身硬件篇